Chunaav Ka Mausam

Phir mausam badla, hawa ne rukh mod liya
Vaadon ki baarish ki chhanchhanahat hai
Kuch laga kya kahin sikkon ki khankhanahat hai?
Gehmagehmiyon mein dekho sansanahat hai.

Kisse uchhale jaayeinge
Juloos nikaale jaeyeinge
Milne milaane ke silsile
Phir se chalaaye jaayenge

Sevak ban-ne chale ya raja,
Sawaari chali re! bajaao baaja!
Dal bal pe Dhindhora peeto!
Uth baith sarvatra paseejo…

Chadha chunaav ka bukhaar
Ho chale parcham taiyaar
Hooye senani bhi agrasar
Dekho  dekho netaji ka asar

Paach saal ke baad nazar aaye
In galiyon koochon mein inke saaye
Duniya mein khoob dhoom machaaye
Ab zaroorat unhein yahan phir le aaye

Khair khabar poochhte hain humse
Khairaghar jo hamaare the hue
Bechaare- jo ban paaya voh to kiya
Gar na hua to kaahe jalaaye jiya?

Phir peeche se ek phusphusahat
Ek kaan se doosre ki aur badhi
Badhte bani ek aisi garjan
Kehne lage usko aandolan

Sach ke sarovar mein jhoot raha tair
Ya jhoot ki daldal ko sach se hai bair
Kranti, aandolan, josh ya sarkaar,
Kahaani kya vahi dohraayenge barambaar?

Majhdhaar mein hum, chadhein kaun naiyaa?
Kaun hoga sahi kismat ka khivaiyya?
Hamaara nanha sa parcha aur itni saari charcha?
Saath mein Hai kya kuch chai paani kharcha?

Baksho hamein ye chichhore naatak
Bahut ho chala kissa yeh jaatak
Ya saanchi samridhhi la dikhao
Ya khud ko na itna ooncha jataao

Ab ki baar, kuchh kar dikhaao
Ab ki baar khushiyaan badhao
Sapne hai bune – sach kar ke lao
Varna phir yahaan na phir munh dikhao

Advertisements